ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានសរសេរនៅលើហ្វេសបុករបស់សម្ដេចថា ពេលនេះលោក ហ៊ុន ជា នឹងវិលត្រលប់ទៅនឹងជាមួយភរិយា និងកូនៗវិញហើយ បន្ទាប់ពីមានការសម្របសម្រួលពីលោក នេត សាវឿន។
សម្ដេចតេជោសរសេរនៅលើហ្វេសបុកផេករបស់សម្ដេចនៅល្ងាចថ្ងៃទី៣ ខែមករា ឆ្នាំ២០២២នេះថា៖ «ល្ងាចនេះប្រើពេល២ម៉ោងដើម្បីហាត់វាយកូនគោលនៅតារាងក្បែរផ្ទះ។ចូលឆ្នាំសកលមិនបានសម្រាកព្រោះមានកម្មវិធីការងារ។ ជាមួយនឹងការវាយបានល្អក៏បានទទួលព័ត៌មានពី នេត សាវឿន ដែលជាអ្នកសម្របសម្រួលឲ្យប្អូនៗថា ហ៊ុន ជា នឹងវិលត្រឡប់ទៅនៅជាមួយភរិយានិងកូនៗវិញខ្ញុំកាន់តែសប្បាយចិត្តដោយឃើញក្មួយៗចេះរួបរួមគ្នាដោះស្រាយបញ្ហាគ្រួសារបានយ៉ាងល្អ»។
គួរឱ្យដឹងផងដែរថាកាលពីយប់ថ្ងៃទី១ ខែមករា ឆ្នាំ២០២៣ សម្ដេចតេជោ ហ៊ុន សែន បានសម្ដែងការខឹងសម្បាជាមួយនឹងលោក ហ៊ុន ជា បន្ទាប់ពីសម្ដេចបានឃើញលោក ហ៊ុន ជា បង្ហោះរូបជាមួយមនុស្សស្រីម្នាក់ដែលមិនមែនជាប្រពន្ធខ្លួន។ សម្ដេចតេជោថាការដែលលោក ហ៊ុន ជា មានស្រីកំណាន់បញ្ឈឺប្រពន្ធវាជារឿងគ្រួសារផ្ទាល់របស់លោក ហ៊ុន ជា តែសម្ដេចទ្រាំមិនឈឺឆ្អាលមិនបានព្រោះអាចនាំឱ្យខូចឈ្មោះត្រកូល «ហ៊ុន»។
សម្ដេចបានបញ្ជាឱ្យលោក នេត សាវឿន ដែលជាមារបស់លោក ហ៊ុន ជា ឱ្យហៅលោក ហ៊ុន ជា មកដោះស្រាយឱ្យបានឆាប់ផងដែរ។
គួរឱ្យដឹងផងដែរថាលោក ហ៊ុន ជា គឺជាកូនប្រុសរបស់លោក ហ៊ុន សាន ដែលត្រូវជាបងប្រុសបង្កើតរបស់សម្ដេចតេជោ ហ៊ុន សែន៕
